AQShdagi Santa-Barbara universiteti tadqiqotchilari dunyoda birinchi bo‘lib insulinni qand kasaliga chalinganlar organizmiga ukolsiz yuborishga imkon beruvchi dori yaratdi. Bu haqda “RIA Novost” xabar bermoqda.
“Hozirgi kunda qand kasaliga chalinganlar kuniga yetti martadan o‘zlariga insulin sanchishga majbur bo‘lmoqda va bu ular uchun katta muammoga aylangan. Shu bois organizmga insulinni og‘iz orqali yuborish uslubini o‘ylab topish biz uchun o‘ta ahamiyatli edi”, — deya ta’kidlagan universitet vakili Samir Mitragorti.
Insulinni og‘iz orqali yuborishdagi asosiy muammo uning molekulalari oshqozon va ichakdagi shira ta’sirida yemirilishida edi. Mitragorti va uning hamkasblari ixtiro qilgan dori kapsulasi ichiga nanomalham joylashtirilgan bo‘lib, u insulin molekulalari yemirilishi oldini oladi va ularning yo‘g‘on ichak devorlari orqali qonga o‘tishiga yordam beradi.
Mazkur dorilar nazorat etuvchi idoralar tomonidan hali ma’qullanganicha yo‘q, hayvonlar va insonlarda sinab ko‘rilmagan. Tegishli ruxsat olinganidan so‘ng Santa-Barbara universiteti olimlari oshqozon va ichakda yemiriladigan boshqa dorilarni (vaksinalar, gormonlar) ham nanomalham orqali yuborish imkoniyatini o‘rganib ko‘radi.
Izoh (0)