Fojiadan bir lahza avval olingan 10 fotosurat

Quyidagi suratlarda tasvirlangan odamlar o‘lim har qachongidan ham yaqinroq ekanligi va ularning o‘limi jamoatchilik mulkiga aylanishi mumkinligini xayollariga ham keltirmagan edi, deb yozadi PPCORN.

1. So‘nggi quchoq

2013-yili Gollandiyaning Oltgensplat shahrida ta’mirlash ishlari uchun shamol turbinasiga chiqqan ikki yosh texnik muqarrar o‘lim ostonasida bir-birini quchoqladi. Oradan soniya o‘tib ulardan biri balandligi 61 metr bo‘lgan minoradan sakraydi, ikkinchisi esa olovli qopqonda oxirigacha qoladi.

2. O‘ldiruvchi sayr

1993-yili Britaniyadagi savdo markazining kuzatuv kameralari ko‘chaga chiqib ketayotgan bu juftlik tasvirini saqlab qolgan. Suratdagi yoshgina bolakay — Jeyms Baljer ko‘p o‘tmay o‘n yashar ikki bola tomonidan vahshiylarcha o‘ldiriladi.

3. Yo‘qlikka sakrash

Parkur — ekstrim va urbanistik hayot go‘zalliklarini o‘zida mujassam qilgan ajoyib sport turi ekanligiga shubha yo‘q. Mazkur fotosuratda Pavel Kashin kamera uchun navbatdagi tryukni amalga oshirishga urinmoqda — olti qavatli bino tomiga “qo‘nish” vaqtida Pavel muvozanatni yo‘qotib, yerga quladi.

4. Abadiyatdan bir daqiqa avval

1853-yili Niagara bo‘ylab raftda suzar ekan, Jozef Eyveri o‘z o‘limiga bu qadar yaqinligini tasavvur ham qilmagan edi. Qayiq ag‘darilib, Eyverining ikki do‘sti shu zahoti cho‘kib ketdi, u esa amallab xodaga osilib, 18 soat davomida uning ustida o‘tirdi. Baxtga qarshi, o‘sha vaqtlarda bunday vaziyatda qolgan odamni qutqarish imkonini beradigan hech qanday vosita yo‘q edi, odamlar bu bechorani faqat uzoqdan kuzatar va hatto suratga ham olardi. Kurashdan charchagan Eyveri oxiri taslim bo‘lib, kuchli suv oqimi bilan Niagara sharsharasidan quladi...

5. Vulqonga “yem bo‘lgan”lar

13 yoshli Omayra Sanchez oilasi bilan birga istiqomat qiladigan qishloq 1985-yili otilgan Nevado del Ruiz vulqoni yaqinida joylashgan edi. Dahshatli sel 23 ming kishini bir lahzada o‘ldirib, qishloqni Yer yuzidan yo‘q qilib yubordi. Sanchez o‘z uyining qoldiqlariga osilib, yordam kelishini mardonavorlik bilan uch kun kutgan, biroq oxir-oqibat taqdirga tan bergan.

6. Qotil uchun dastxat

Qo‘shiqchi Jon Lennon muxlisi Mark Chapmanga dastxat bermoqda — oradan bir necha soat o‘tib Lennonni o‘z uyi ostonasida aynan Chapman otib tashlaydi.

7. O‘lim teatri

Amerikalik siyosiy arbob va AQShning Pensilvaniya shtati g‘aznachisi Badd Dvayer 1986-yili korrupsiyada ayblandi. Bu fotosurat Dvayer o‘ziga nisbatan ilgari surilgan barcha ayblovlarni rad etgan va oxirida qog‘oz xaltadan to‘pponchani chiqarib, yig‘ilganlarni vahimaga solgan matbuot anjumanidan olingan. Qo‘riqchilar Baddga yaqinlashishi bilan, u: “Bu narsa ishlab ketishi mumkin!”, — deb baqirgan, so‘ng to‘pponcha uchini og‘ziga to‘g‘rilab, tepkini bosgan...

8. Hammaning ko‘z oldida yuz bergan fojia

Bu fojia 2013-yili Nyu-York metropolitenida yuz bergan — Ki-Suk Xan bilan kelisha olmay qolgan Naim Devis, qisqa bahsdan so‘ng suhbatdoshini temiryo‘lga itarib yuboradi. Ushbu fotosurat temiryo‘ldagi erkak poyezd tomonidan majaqlab tashlanishidan bir soniya avval olingan. Bekatda odam ko‘p bo‘lishiga qaramay, hech kim Ki-Suk Xanning platformaga chiqib olishiga yordam bermagan.

9. Yaqinlashayotgan dahshat

Shri-Lankadagi kurortda hordiq chiqarayotganlar sohilga yaqinlashib kelayotgan sunamini tomosha qilmoqda — Hind okeani tubliklarida yuz bergan zilzila oqibatida ko‘tarilgan bu sunami 2004-yili yuzlab odamlarning hayotiga zomin bo‘lgandi.

10. Xayrlashuv paradi

AQSh prezidenti Jon Kennedining 1963-yil noyabrdagi Dallasga tashrifi vaqtida olingan eng so‘nggi fotosuratlaridan biri. Oradan ko‘p o‘tmay Li Xarvi Osvald olomon orasidan chiqib, prezidentga qarata ikki marta o‘q uzadi...