Фожиадан бир лаҳза аввал олинган 10 фотосурат

Қуйидаги суратларда тасвирланган одамлар ўлим ҳар қачонгидан ҳам яқинроқ эканлиги ва уларнинг ўлими жамоатчилик мулкига айланиши мумкинлигини хаёлларига ҳам келтирмаган эди, деб ёзади PPCORN.

1. Сўнгги қучоқ

2013 йили Голландиянинг Олтгенсплат шаҳрида таъмирлаш ишлари учун шамол турбинасига чиққан икки ёш техник муқаррар ўлим остонасида бир-бирини қучоқлади. Орадан сония ўтиб улардан бири баландлиги 61 метр бўлган минорадан сакрайди, иккинчиси эса оловли қопқонда охиригача қолади.

2. Ўлдирувчи сайр

1993 йили Британиядаги савдо марказининг кузатув камералари кўчага чиқиб кетаётган бу жуфтлик тасвирини сақлаб қолган. Суратдаги ёшгина болакай — Жеймс Балжер кўп ўтмай ўн яшар икки бола томонидан ваҳшийларча ўлдирилади.

3. Йўқликка сакраш

Паркур — экстрим ва урбанистик ҳаёт гўзалликларини ўзида мужассам қилган ажойиб спорт тури эканлигига шубҳа йўқ. Мазкур фотосуратда Павел Кашин камера учун навбатдаги трюкни амалга оширишга уринмоқда — олти қаватли бино томига «қўниш» вақтида Павел мувозанатни йўқотиб, ерга қулади.

4. Абадиятдан бир дақиқа аввал

1853 йили Ниагара бўйлаб рафтда сузар экан, Жозеф Эйвери ўз ўлимига бу қадар яқинлигини тасаввур ҳам қилмаган эди. Қайиқ ағдарилиб, Эйверининг икки дўсти шу заҳоти чўкиб кетди, у эса амаллаб ходага осилиб, 18 соат давомида унинг устида ўтирди. Бахтга қарши, ўша вақтларда бундай вазиятда қолган одамни қутқариш имконини берадиган ҳеч қандай восита йўқ эди, одамлар бу бечорани фақат узоқдан кузатар ва ҳатто суратга ҳам оларди. Курашдан чарчаган Эйвери охири таслим бўлиб, кучли сув оқими билан Ниагара шаршарасидан қулади...

5. Вулқонга «ем бўлган»лар

13 ёшли Омайра Санчез оиласи билан бирга истиқомат қиладиган қишлоқ 1985 йили отилган Невадо дел Руиз вулқони яқинида жойлашган эди. Даҳшатли сел 23 минг кишини бир лаҳзада ўлдириб, қишлоқни Ер юзидан йўқ қилиб юборди. Санчез ўз уйининг қолдиқларига осилиб, ёрдам келишини мардонаворлик билан уч кун кутган, бироқ охир-оқибат тақдирга тан берган.

6. Қотил учун дастхат

Қўшиқчи Жон Леннон мухлиси Марк Чапманга дастхат бермоқда — орадан бир неча соат ўтиб Леннонни ўз уйи остонасида айнан Чапман отиб ташлайди.

7. Ўлим театри

Америкалик сиёсий арбоб ва АҚШнинг Пенсильвания штати ғазначиси Бадд Дваер 1986 йили коррупцияда айбланди. Бу фотосурат Дваер ўзига нисбатан илгари сурилган барча айбловларни рад этган ва охирида қоғоз халтадан тўппончани чиқариб, йиғилганларни ваҳимага солган матбуот анжуманидан олинган. Қўриқчилар Баддга яқинлашиши билан, у: «Бу нарса ишлаб кетиши мумкин!», — деб бақирган, сўнг тўппонча учини оғзига тўғрилаб, тепкини босган...

8. Ҳамманинг кўз олдида юз берган фожиа

Бу фожиа 2013 йили Нью-Йорк метрополитенида юз берган — Ки-Сук Хан билан келиша олмай қолган Наим Дэвис, қисқа баҳсдан сўнг суҳбатдошини темирйўлга итариб юборади. Ушбу фотосурат темирйўлдаги эркак поезд томонидан мажақлаб ташланишидан бир сония аввал олинган. Бекатда одам кўп бўлишига қарамай, ҳеч ким Ки-Сук Ханнинг платформага чиқиб олишига ёрдам бермаган.

9. Яқинлашаётган даҳшат

Шри-Ланкадаги курортда ҳордиқ чиқараётганлар соҳилга яқинлашиб келаётган цунамини томоша қилмоқда — Ҳинд океани тубликларида юз берган зилзила оқибатида кўтарилган бу цунами 2004 йили юзлаб одамларнинг ҳаётига зомин бўлганди.

10. Хайрлашув паради

АҚШ президенти Жон Кеннедининг 1963 йил ноябрдаги Далласга ташрифи вақтида олинган энг сўнгги фотосуратларидан бири. Орадан кўп ўтмай Ли Харви Освалд оломон орасидан чиқиб, президентга қарата икки марта ўқ узади...