Rossiya va Misr A321 halokatini tekshirishda FQB ko‘magidan bosh tortdi
Rossiya va Misr hukumatlari Rossiyaga tegishli A321 samolyotining Sinay yarim orolidagi halokati sabablarini tekshirishda AQSh Federal qidiruv byurosi yordamidan bosh tortadi. Bu haqda AQSh hukumatidagi manbasiga tayanib, Reuters xabar bermoqda, deb yozadi Meduza.
Avvalroq AQSh Federal qidiruv byurosi Airbus A321 samolyotining halokati sabablarini tekshirishda Rossiya va Misrga yordam ko‘rsatishga tayyor ekanligini ma’lum qilgan edi.
Eslatib o‘tamiz, Rossiya rasmiylari AQSh Federal qidiruv byurosidan Misrda A321 samolyoti halokatini tekshirishda yordam so‘ragan edi.
31-oktabr, shanba kuni Misrda Metrojet (“Kogalimavia”) aviakompaniyasining Sharm-ash-Shayxdan Sankt-Peterburgga uchayotgan Airbus A321 layneri halokatga uchradi. Samolyot bortida bo‘lgan 224 kishining barchasi halok bo‘ldi.
