Toshkentning Sirg‘ali tumanida yo‘l harakati xavfsizligi xizmati xodimi yo‘lning qarama-qarshi qatnov qismida harakatlanayotgan xizmat avtomobiliga hech qanday chora ko‘rmadi. Vaziyat aks etgan fotosurat Facebook’dagi “Voditeli Tashkenta” guruhida e’lon qilingan.
Guruhda 3-noyabr, seshanba kuni e’lon qilingan fotosuratda davlat raqam belgisi 01 202 VSF bo‘lgan, ayni vaqtda ko‘k rangli yalt-yalt etuvchi chiroq-mayoqchasi (“migalka”si) bo‘lmagan Lacetti rusumli avtomobil Yangi Sergeli va Choshtepa ko‘chalari kesishmasiga yo‘lning qarama-qarshi qatnov qismidan yaqinlashib kelgani tasvirlangan.
Bu vaqtda kesishmada bo‘lgan va Lacetti’ning bevosita yonida turgan yo‘l harakati xavfsizligi xizmati nazoratchisi avtomobil haydovichisiga nisbatan hech qanday chora ko‘rmagan. Fotoxabar ostida foydalanuvchilar tomonidan qoldirilgan fikrlarda davlat raqami VSF seriyali avtomobillar ichki ishlar idoralari vakillarida bo‘lishi qayd etilgan.
Qayd etish joiz, Yo‘l harakati xavfsizligi qoidalarini tasdiqlash to‘g‘risidagi Vazirlar Mahkamasi qarorining 7.1 bandiga muvofiq, faqatgina ko‘k rangli yalt-yalt etuvchi chiroq-mayoqchasi va (yoki) maxsus tovushli ishorasi yoqilgan tezkor va maxsus xizmat transport vositalarining haydovchilari kechiktirib bo‘lmaydigan xizmat vazifalarini bajarayotib, yo‘l harakati xavfsizligini ta’minlash sharti bilan qoidalarning ba’zi bandlaridan chetga chiqishlari mumkin.
Ko‘k rangli chiroq mayoqchaga qo‘shimcha qizil rangli chiroq-mayoqcha ham yoqilishi mumkin. Boshqa yo‘l harakati qatnashchilariga nisbatan imtiyozga ega bo‘lishlari uchun bunday transport vositalarida yalt-yalt etuvchi chiroq mayoqcha va (yoki) maxsus tovushli ishorasi yoqilgan bo‘lishi shart. Ular o‘zlariga yo‘l berilayotganligiga ishonch hosil qilganlaridan so‘nggina imtiyozdan foydalanishlari mumkin.
Ma’lumot uchun, qarama-qarshi yo‘nalishda harakatlanganlik uchun eng kam ish haqining 10 baravari — 1 302 400 so‘m (4-noyabr holatiga ko‘ra) miqdorida jarima belgilanadi.
Izoh (0)