Тошкентда МДҲга аъзо давлатлар темир йўл транспорти бўйича Кенгашининг 63-мажлиси бошланди. Мажлисда ҳамкорликни янада ривожлантириш, Кенгашнинг аввалги мажлислари доирасида эришилган келишувлар қандай амалга оширилаётганига оид масалалар муҳокама этилди ҳамда шу йилнинг 9 ойи давомида бажарилган ишлар сарҳисоб қилинди. Бу ҳақда ЎзА хабар бермоқда.
Ўтган даврда Ҳамдўстликка аъзо давлатларнинг пўлат излари орқали 1,4 миллиард тонна юк ташилгани ва бу қабул қилинган мажбуриятлардан 15 фоиз кўп экани таъкидланди. Бундан ташқари, ташишлар ўртача масофаси 3,5 фоиз ошгани қайд этилди. Ўтган вақт мобайнида контейнерларда 20 миллион тонна юк ташилди ва бу қабул қилинган мажбуриятлардан 6,1 фоиз кўпдир. 2015 йилнинг тўққиз ойида халқаро йўналишларда хизмат кўрсатилган йўловчилар сони 14,8 миллион кишини ташкил этди.
Тадбирда Ўзбекистон Республикаси темир йўлларининг ҳисобот давридаги фаолиятига алоҳида эътибор қаратилди. Ўзбекистон темир йўллари юқори технологияларга асосланган замонавий транспорт тизими бўлиб, бугунги кунда уларнинг узунлиги 6 минг километрдан зиёдни ташкил этади. Шу боис мамлакат Евросиё транспорт маконида темир йўл орқали ташишни ташкил этиш ва транзит юкларни етказиш, халқаро транспорт коридорлари имкониятларидан самарали фойдаланишда муҳим ўрин тутмоқда.
Эслатиб ўтамиз, МДҲга аъзо давлатларнинг темир йўл транспорти бўйича Кенгаши ва унинг ижроия органи – Кенгаш дирекцияси 1992 йил 14 февралда МДҲга аъзо давлатлар ҳукумат раҳбарларининг келишувига биноан ташкил этилган.
Изоҳ (0)