Bir hafta avval Moskvada do‘konda o‘zi topib olgan hamyonni egasiga qaytarib bergan tojikistonlik taksichi Zabehullo Shafe’zodani teleko‘rsatuvlarga chaqirishmoqda, unga dunyoning turli burchaklaridan qo‘ng‘iroq qilib, minnatdorlik bildirishmoqda, deb yozadi Sputnik.
Nashrning “Nima uchun hamyon egasini qat’iyat bilan qidirdingiz?” — degan savoliga javoban, Zabehullo shunday dedi: “Men shunday tarbiyalanganman va birovning narsasi yaxshilik keltirmaydi, deb bilaman. Agar hamyonni qaytib bermaganimda, tashvish ichida qolardim. Bundan tashqari, hamyon ichida bo‘lgan kartalarning barchasini qayta tiklash uchun uning egasi ancha vaqt sarflagan bo‘lardi”.
Yigit u bilan bog‘liq voqea ijtimoiy tarmoqlarda tarqalib ketgach, mobil telefoniga pullar tusha boshlaganini, ularning barchasini yig‘ib, hamyon egasi — Alyona Kuratovaning xasta bolalarga ko‘mak beruvchi jamg‘armasiga ko‘chirib o‘tkazganini ta’kidladi. Pulni yechish vaqtida uning miqdori 7550 rublni tashkil etgan.
Zabehullo Alyona unga qo‘ng‘iroq qilib, teleko‘rsatuvda suratga tushishga taklif qilganini, 7-noyabr, shanba kuni syomka jarayoni boshlanishini aytdi. Shuningdek, uning so‘zlariga ko‘ra, AQSh, Irlandiya va dunyoning boshqa mamlakatlaridan qo‘ng‘iroq qilishib, ushbu xatti-harakati uchun rahmatlar aytishmoqda. Hatto, Tojikiston elchixonasidan ham minnatdorlik bildirish maqsadida u bilan bog‘lanishgan.
Kelgusidagi rejalari haqida gapirar ekan, Zabehullo hozircha taksichilik qilishda davom etishini, keyinchalik yana o‘ylab ko‘rishini ta’kidladi.
Eslatib o‘tamiz, Tojikistonning Panjikent shahri yaqinidagi Margedar qishlog‘idan bo‘lgan Zabehullo Shafe’zoda qizning hamyonini do‘kondan topib olgan. U bilan bog‘lanish mumkin bo‘lgan ma’lumotlarni topa olmagan yigit qizning kartochkasiga kichkina summadagi pul o‘tkazmalari bilan birga qisqa xabar ham yubora boshlaydi. Bu haqdagi ma’lumot Alyonaning mobil telefoniga SMS-xabar shaklida boradi.
Shundan so‘ng, hamyon egasi unga qo‘ng‘iroq qilgan. Shafe’zoda hamyonni qizning uyiga olib borib bergan.
Ijtimoiy tarmoq foydalanuvchilari nafaqat uning halolligi, balki topqirligiga ham tan berdi. Ular Zabehulloning bu ishini javobsiz qoldirmaslikka qaror qildi. Alyonaning internetdagi postida qolgan kartochka ma’lumotlari bo‘yicha ular tojikistonlik yigitga kichik pul o‘tkazmalarini yubordi.
Izoh (0)