Hindiston bosh vaziri Narendra Modi oltinni monetizatsiya qilish bo‘yicha dastur ishga tushirilganini e’lon qildi. Bu haqda “RIA Novosti” xabar bermoqda.
“Biz 20 ming tonna oltini bor qashshoq mamlakatmiz. Balki, mana shu 20 ming tonna oltin bekor yotgani sababli ham qashshoqdirmiz. Hindistonning qashshoq holicha qolishiga hech bir sabab yo‘q. Agar biz barchamiz to‘g‘ri yo‘nalishda kichik harakatni amalga oshirsak, bu yorliqdan qutilamiz. Oltin bilan munosabatlarga doir turli dasturlar bu yo‘ldagi muhim qadamlardan biri bo‘ladi”, — dedi Modi.
Mamlakat Moliya vazirligi ma’lumotlariga ko‘ra, Hindiston hukumati oltin bilan bog‘liq uchta — davlat oltin obligatsiyalari, oltinni monetizatsiya qilish va Hindiston oltin tangasini chiqarish dasturlarini amalga oshira boshlaydi.
Monetizatsiya dasturi oltinni qisqa (1—3 yilga), o‘rta (5—7 yilga) va uzoq (12—15 yilga) muddatlarga bankka joylashtirish imkoniyatini nazarda tutadi. Garovga qo‘yilgan oltindan foiz to‘lanadi, bu foiz to‘lovi qator soliqlardan, xususan, kapitalning o‘sishi uchun belgilangan bojdan soqit qilinadi. Bundan tashqari, mamlakat fuqarolarida Hindiston Zaxira banki tomonidan chiqarilgan davlat oltin obligatsiyalarini sotib olish imkoniyati paydo bo‘ladi.
Oltin bo‘yicha jahon kengashi ma’lumotlariga ko‘ra, Hindiston jismoniy shaxslari va muassasalari ixtiyoridagi qariyb 22—23 ming tonna oltin hech qanday foyda keltirmasdan turibdi. Ayni vaqtda, Hindiston har yili umumiy qiymati 35—45 milliard dollarga teng 850—1000 tonna oltinni import qiladi.
Izoh (0)