Ҳиндистон бош вазири олтинни монетизация қилиш дастурини ишга туширди

Ҳиндистон бош вазири Нарендра Моди олтинни монетизация қилиш бўйича дастур ишга туширилганини эълон қилди. Бу ҳақда «РИА Новости» хабар бермоқда.

«Биз 20 минг тонна олтини бор қашшоқ мамлакатмиз. Балки, мана шу 20 минг тонна олтин бекор ётгани сабабли ҳам қашшоқдирмиз. Ҳиндистоннинг қашшоқ ҳолича қолишига ҳеч бир сабаб йўқ. Агар биз барчамиз тўғри йўналишда кичик ҳаракатни амалга оширсак, бу ёрлиқдан қутиламиз. Олтин билан муносабатларга доир турли дастурлар бу йўлдаги муҳим қадамлардан бири бўлади», — деди Моди.

Мамлакат Молия вазирлиги маълумотларига кўра, Ҳиндистон ҳукумати олтин билан боғлиқ учта — давлат олтин облигациялари, олтинни монетизация қилиш ва Ҳиндистон олтин тангасини чиқариш дастурларини амалга ошира бошлайди.

Монетизация дастури олтинни қисқа (1—3 йилга), ўрта (5—7 йилга) ва узоқ (12—15 йилга) муддатларга банкка жойлаштириш имкониятини назарда тутади. Гаровга қўйилган олтиндан фоиз тўланади, бу фоиз тўлови қатор солиқлардан, хусусан, капиталнинг ўсиши учун белгиланган бождан соқит қилинади. Бундан ташқари, мамлакат фуқароларида Ҳиндистон Захира банки томонидан чиқарилган давлат олтин облигацияларини сотиб олиш имконияти пайдо бўлади.

Олтин бўйича жаҳон кенгаши маълумотларига кўра, Ҳиндистон жисмоний шахслари ва муассасалари ихтиёридаги қарийб 22—23 минг тонна олтин ҳеч қандай фойда келтирмасдан турибди. Айни вақтда, Ҳиндистон ҳар йили умумий қиймати 35—45 миллиард долларга тенг 850—1000 тонна олтинни импорт қилади.