Тошкентнинг Сирғали туманида йўл ҳаракати хавфсизлиги хизмати ходими йўлнинг қарама-қарши қатнов қисмида ҳаракатланаётган хизмат автомобилига ҳеч қандай чора кўрмади. Вазият акс этган фотосурат Facebook’даги «Водители Ташкента» гуруҳида эълон қилинган.
Гуруҳда 3 ноябрь, сешанба куни эълон қилинган фотосуратда давлат рақам белгиси 01 202 VSF бўлган, айни вақтда кўк рангли ялт-ялт этувчи чироқ-маёқчаси («мигалка»си) бўлмаган Lacetti русумли автомобиль Янги Сергели ва Чоштепа кўчалари кесишмасига йўлнинг қарама-қарши қатнов қисмидан яқинлашиб келгани тасвирланган.
Бу вақтда кесишмада бўлган ва Lacetti’нинг бевосита ёнида турган йўл ҳаракати хавфсизлиги хизмати назоратчиси автомобиль ҳайдовичисига нисбатан ҳеч қандай чора кўрмаган. Фотохабар остида фойдаланувчилар томонидан қолдирилган фикрларда давлат рақами VSF серияли автомобиллар ички ишлар идоралари вакилларида бўлиши қайд этилган.
Қайд этиш жоиз, Йўл ҳаракати хавфсизлиги қоидаларини тасдиқлаш тўғрисидаги Вазирлар Маҳкамаси қарорининг 7.1 бандига мувофиқ, фақатгина кўк рангли ялт-ялт этувчи чироқ-маёқчаси ва (ёки) махсус товушли ишораси ёқилган тезкор ва махсус хизмат транспорт воситаларининг ҳайдовчилари кечиктириб бўлмайдиган хизмат вазифаларини бажараётиб, йўл ҳаракати хавфсизлигини таъминлаш шарти билан қоидаларнинг баъзи бандларидан четга чиқишлари мумкин.
Кўк рангли чироқ маёқчага қўшимча қизил рангли чироқ-маёқча ҳам ёқилиши мумкин. Бошқа йўл ҳаракати қатнашчиларига нисбатан имтиёзга эга бўлишлари учун бундай транспорт воситаларида ялт-ялт этувчи чироқ маёқча ва (ёки) махсус товушли ишораси ёқилган бўлиши шарт. Улар ўзларига йўл берилаётганлигига ишонч ҳосил қилганларидан сўнггина имтиёздан фойдаланишлари мумкин.
Маълумот учун, қарама-қарши йўналишда ҳаракатланганлик учун энг кам иш ҳақининг 10 баравари — 1 302 400 сўм (4 ноябрь ҳолатига кўра) миқдорида жарима белгиланади.
Изоҳ (0)