Ruminiyadagi hukumatga qarshi namoyishlar Buxarestdan boshqa shaharlarga ko‘chdi

Ruminiyada “Kollektiv” tungi klubida yuz bergan yong‘inda aybdor amaldorlarni jazolash talabi bilan o‘tkazilayotgan norozilik namoyishlari poytaxt Buxarestdan boshqa shaharlarga ham ko‘chdi. “TASS” xabariga ko‘ra, 4-noyabr kuni tongda Brashov, Ployeshti, Yassi, Alba-Yuliya, Merkurya-Chuk va boshqa shaharlarda ham minglab namoyishchilar ko‘chalarga chiqqan.

Namoyishchilar mamlakat bosh vaziri Viktor Ponta va uning o‘rinbosari, shuningdek, ichki ishlar vaziri Gabriel Oprining iste’fosini talab qilmoqda. Ularni tungi klubdagi yong‘inga sabab bo‘lgan korrupsionerlarga ko‘mak berganlikda ayblashmoqda — yong‘in oqibatida 32 kishi halok bo‘ldi, 200 dan ortiq kishi jabrlandi.

OAV ma’lumotlariga ko‘ra, tungi klub faoliyatiga ruxsat bergan shaharning 4-sektori ma’muriyati boshlig‘i Kristian Piyedoneni jazolashni talab qilib, Buxarest ko‘chalariga 25 mingga yaqin kishi chiqqan. Namoyish ishtirokchilari bir necha kolonna bo‘lib hukumat binosi tomon yo‘l olgan, binoni o‘rab olgan politsiya bo‘linmalari bilan to‘qnashgan va ortga qaytarilgan.

Xabar berishlaricha, namoyishchilar “Sharmanda amaldorlar!”, “Korrupsiya va amaldorlarning ochko‘zligi Ruminiyani o‘ldirmoqda!”, “Yo‘qolsin Ponta!”, “Yo‘qolsin Opri!”, “Piyedone — jinoyatchi!” kabi shior va chaqiriqlarni ko‘tarib olgan. Tongga yaqin Buxarest va boshqa shaharlardagi aksariyat namoyishchilar tarqalib ketgan. Buxarest markazidagi ikki maydonda, politsiya ma’lumotlariga ko‘ra, 5 mingga yaqin namoyishchi qolgan.

O‘z navbatida, Ruminiya prezidenti Klaus Yoxannis “bugungi namoyishlardan qattiq ta’sirlangani”ni qayd etib o‘tdi. “Odamlar ularning sha’niga nisbatan hurmat ko‘rsatilishini talab qilmoqda, ular kimdir siyosiy javobgarlikni o‘z bo‘yniga olishini kutmoqda. Keyingi qadam mazkur namoyishlarni rad eta olmaydigan siyosatchilar tomonidan qo‘yilishi kerak”, — deb yozdi davlat rahbari Facebook’dagi sahifasida. Avvalroq u Ponta va Opridan, ularga nisbatan korrupsiya va boshqa huquqbuzarliklar bo‘yicha ayblovlar ilgari surilgani munosabati bilan, iste’fo berishni talab qilgandi.