Joriy yilning yanvar oyidan beri O‘rtayer dengizi orqali Yevropaga kirib kelgan muhojirlar soni 750 mingdan oshdi. Bu haqda BMTning qochoqlar ishi bo‘yicha bosh komissari Antoniu Guterresh jahon tashkiloti Bosh Assambleyasining uchinchi qo‘mitasida ma’lum qildi, deb yozadi “TASS”.
“Yanvar oyidan beri 750 mingdan ortiq kishi Yevropaga yetib keldi. 3400 dan ortiq qochoq cho‘kib ketgan. Shuningdek, qurbonlar soni noqulay ob-havo sharoiti tufayli ortib bormoqda”, — dedi u o‘z nutqida.
Uning ta’kidlashicha, har kuni Gretsiya sohillaridagi orollarga olti mingdan sakkiz minggacha muhojir keladi.
“Yevropa ittifoqi tang holatga barham berish uchun yaxlit va keng qamrovli hududiy yondashuv zarurligini ko‘zda tutmoqda”, — dedi Guterresh.
U Yevropa ittifoqi davlatlarining 160 ming kishini ko‘chirib kiritish haqidagi qarorini “to‘g‘ri yo‘nalish sari qadam” deb atadi, biroq jarayonning o‘ta sustligidan shikoyat qildi.
BMT bosh komissari Yevropa mamlakatlari qidiruv-qutqaruv operatsiyalarining samaradorligini oshirishi zarurligini ta’kidladi.
“O‘tgan haftaning o‘zidayoq Gretsiya sohillarida 13 ta kema halokatga uchradi, natijada 150 dan ortiq inson halok bo‘ldi yoki bedarak yo‘qoldi, ularning orasida yosh bolalar ham bor”, — dedi Guterresh.
BMT vakili mamlakatlar rahbarlarini qochoqlarni boshpana bilan ta’minlashga qarshilik bildirmaslikka chaqirdi.
Izoh (0)