Руминияда «Коллектив» тунги клубида юз берган ёнғинда айбдор амалдорларни жазолаш талаби билан ўтказилаётган норозилик намойишлари пойтахт Бухарестдан бошқа шаҳарларга ҳам кўчди. «ТАСС» хабарига кўра, 4 ноябрь куни тонгда Брашов, Плоешти, Ясси, Алба-Юлия, Меркуря-Чук ва бошқа шаҳарларда ҳам минглаб намойишчилар кўчаларга чиққан.
Намойишчилар мамлакат бош вазири Виктор Понта ва унинг ўринбосари, шунингдек, ички ишлар вазири Габриэл Опрининг истеъфосини талаб қилмоқда. Уларни тунги клубдаги ёнғинга сабаб бўлган коррупционерларга кўмак берганликда айблашмоқда — ёнғин оқибатида 32 киши ҳалок бўлди, 200 дан ортиқ киши жабрланди.
ОАВ маълумотларига кўра, тунги клуб фаолиятига рухсат берган шаҳарнинг 4-сектори маъмурияти бошлиғи Кристиан Пиедонени жазолашни талаб қилиб, Бухарест кўчаларига 25 мингга яқин киши чиққан. Намойиш иштирокчилари бир неча колонна бўлиб ҳукумат биноси томон йўл олган, бинони ўраб олган полиция бўлинмалари билан тўқнашган ва ортга қайтарилган.
Хабар беришларича, намойишчилар «Шарманда амалдорлар!», «Коррупция ва амалдорларнинг очкўзлиги Руминияни ўлдирмоқда!», «Йўқолсин Понта!», «Йўқолсин Опри!», «Пиедоне — жиноятчи!» каби шиор ва чақириқларни кўтариб олган. Тонгга яқин Бухарест ва бошқа шаҳарлардаги аксарият намойишчилар тарқалиб кетган. Бухарест марказидаги икки майдонда, полиция маълумотларига кўра, 5 мингга яқин намойишчи қолган.
Ўз навбатида, Руминия президенти Клаус Ёханнис «бугунги намойишлардан қаттиқ таъсирлангани»ни қайд этиб ўтди. «Одамлар уларнинг шаънига нисбатан ҳурмат кўрсатилишини талаб қилмоқда, улар кимдир сиёсий жавобгарликни ўз бўйнига олишини кутмоқда. Кейинги қадам мазкур намойишларни рад эта олмайдиган сиёсатчилар томонидан қўйилиши керак», — деб ёзди давлат раҳбари Facebook’даги саҳифасида. Аввалроқ у Понта ва Опридан, уларга нисбатан коррупция ва бошқа ҳуқуқбузарликлар бўйича айбловлар илгари сурилгани муносабати билан, истеъфо беришни талаб қилганди.
Изоҳ (0)