A321 qulashi oqibatida halok bo‘lganlardan 33 kishining shaxsi aniqlandi, jasadlarni yaqinlariga berish boshlandi. Bu haqda Sankt-Peterburg gubernatori o‘rinbosari Igor Albin ma’lum qildi, deya xabar beradi “TASS”.
“4-noyabr, chorshanba kuni ertalabki holatga ko‘ra 33 kishining shaxsi aniqlandi, 22 nafar qurbonning oilasiga buni tasdiqlovchi hujjatlar berildi, yana 11 oilaga taqdim etishga hozirlik ko‘rilmoqda. Bir kishining jasadi yaqinlariga topshirildi. Hukumat komissiyasi qaroriga ko‘ra, qidiruv hududi 40 kvadrat kilometrgacha kengaytirildi”, — deya ta’kidlagan Albin.
Shahar ijtimoiy siyosat qo‘mitasi raisi Aleksandr Rjanenkovning aytishicha, halok bo‘lganlarning oilasiga to‘lovlar berilishi 5-noyabr, payshanba kunidan boshlanadi. Shuningdek, oilalarning qurbonlarni qayerga dafn etilishi yuzasidan fikrlari o‘rganilmoqda.
Eslatib o‘tamiz, oldinroq 28 kishining shaxsi aniqlangani haqida xabar berilgandi.
Izoh (0)