Жорий йилнинг январь ойидан бери Ўртаер денгизи орқали Европага кириб келган муҳожирлар сони 750 мингдан ошди. Бу ҳақда БМТнинг қочоқлар иши бўйича бош комиссари Антониу Гутерреш жаҳон ташкилоти Бош Ассамблеясининг учинчи қўмитасида маълум қилди, деб ёзади «ТАСС».
«Январь ойидан бери 750 мингдан ортиқ киши Европага етиб келди. 3400 дан ортиқ қочоқ чўкиб кетган. Шунингдек, қурбонлар сони ноқулай об-ҳаво шароити туфайли ортиб бормоқда», — деди у ўз нутқида.
Унинг таъкидлашича, ҳар куни Греция соҳилларидаги оролларга олти мингдан саккиз минггача муҳожир келади.
«Европа иттифоқи танг ҳолатга барҳам бериш учун яхлит ва кенг қамровли ҳудудий ёндашув зарурлигини кўзда тутмоқда», — деди Гутерреш.
У Европа иттифоқи давлатларининг 160 минг кишини кўчириб киритиш ҳақидаги қарорини «тўғри йўналиш сари қадам» деб атади, бироқ жараённинг ўта сустлигидан шикоят қилди.
БМТ бош комиссари Европа мамлакатлари қидирув-қутқарув операцияларининг самарадорлигини ошириши зарурлигини таъкидлади.
«Ўтган ҳафтанинг ўзидаёқ Греция соҳилларида 13 та кема ҳалокатга учради, натижада 150 дан ортиқ инсон ҳалок бўлди ёки бедарак йўқолди, уларнинг орасида ёш болалар ҳам бор», — деди Гутерреш.
БМТ вакили мамлакатлар раҳбарларини қочоқларни бошпана билан таъминлашга қаршилик билдирмасликка чақирди.
Изоҳ (0)