Rossiya hukumati siyosiy qatag‘on qurbonlari xotirasini abadiylashtirish to‘g‘risidagi qonun loyihasini ko‘rib chiqish uchun Davlat dumasiga yo‘naltirdi. Bu haqda “Gazeta.ru” xabar bermoqda.
“Qonun loyihasi orqali Rossiya Federatsiyasining davlat hokimiyati va federal organlari, Federatsiya subyektlari davlat hokimiyati va mahalliy o‘z-o‘zini boshqarish organlari tomonidan siyosiy qatag‘on qurbonlari xotirasini abadiylashtirishga doir topshiriqlarni ado etish uchun optimal huquqiy va tashkiliy sharoitlar yaratishga yo‘naltirilgan alohida qonuniy aktlarga o‘zgartirishlar kiritish taklif etilmoqda” — deyiladi izohda.
Jumladan, davlat organlari va mahalliy hokimiyat zimmasiga siyosiy qatag‘on qurbonlari xotirasini abadiylashtirish huquqini biriktirish ham taklif etilmoqda. Bundan tashqari, ma’muriy boshqarmalarga siyosiy qatag‘on qurbonlari dafn etilgan joylarni madaniy meros obyektlari ro‘yxatiga kiritish vazifasi yuklatiladi.
“Qonun loyihasida hukumat va mahalliy o‘z-o‘zini boshqarish organlari tomonidan qo‘llab-quvvatlanuvchi, siyosiy qatag‘on qurbonlari xotirasini abadiylashtirish faoliyatini yurituvchi ijtimoiy notijorat tashkilotlar ro‘yxati to‘ldirilishi ham ko‘zda tutilgan”, — deyiladi hukumat xabarida.
Rasmiy hujjatda keltirilishicha, Federal yig‘inda hujjat ko‘rib chiqilishidagi rasmiy vakil adliya vaziri o‘rinbosari Mixail Galperin bo‘ladi.
Izoh (0)