Chechenistonda respublika rahbari Ramzan Qodirovga qarshi qaratilgan suiqasd oldi olindi. Bu haqda, “Grozniy” telekompaniyasiga asoslanib, “RBK” xabar bermoqda.
Huquqbuzarlar — argunlik yoshlar hibsga olingan. “Ularning yovuz maqsadi ochiq ko‘rinib turgan bo‘lsa-da, respublika rahbari bu yoshlarni kechirdi va ularga o‘zini oqlash uchun imkoniyat berdi”, — deyiladi telekompaniya xabarida.
Qodirovning o‘zi Instagram’dagi sahifasida ma’lum qilishicha, u 1-noyabr kuni “argunliklarning katta guruhi bilan besh soatdan ortiq suhbatlashgan. Ma’lum bo‘lishicha, 20 ga yaqin kishi vahhobiylik g‘oyasi atrofida birlashgan. Ularning miyasini bir chalasavod imom zaharlagan”, deb yozadi Qodirov.
Checheniston rahbarining so‘zlariga ko‘ra, o‘smirlarga “Ramzan Qodirov vahhobiylikning asosiy dushmani deya tinimsiz uqtirilgan”. Qodirov Argundagi uchrashuvga hibsga olingan yoshlarning ota-onalari va qarindoshlarini taklif qilib, “ularning farzandlari nimalar bilan shug‘ullanayotganini batafsil so‘zlab bergan”.
Qarindoshlar “Ramzan Qodirovning nuqtai nazarini to‘la qo‘llab-quvvatlab, farzandlarining xulq-atvorini qat’iy nazorat qilishga va’da berdi. O‘z navbatida, yoshlar o‘zini oqlash uchun berilgan imkoniyat uchun Ramzan Qodirovga minnatdorchilik bildirdi”, deya xulosa qiladi telekompaniya.
Ramzan Qodirov bundan avval ham o‘ziga qarshi suiqasdlar tayyorlangani haqida bir necha bor xabar bergan. 2015-yil martida Qodirov uni ikki dog‘istonlik o‘ldirmoqchi bo‘lgani haqida ma’lum qilgandi. Iyul oyida oxirida esa jangarilar guruhi uning joniga qasd qilishni rejalashtirganini bildirgandi.
Izoh (0)