Санкт-Петербургда A321 ҳалокати муносабати билан мотамни яна икки кун — 2 ва 3 ноябрь кунлари ҳам давом эттиришга қарор қилинди. Бу ҳақда шаҳар губернатори Георгий Полтавченко журналистларга маълум қилди, дея хабар беради «Ведомости».
Полтавченко, шунингдек, 2 ноябрь, душанба куни Синай яриморолида ҳалок бўлганларнинг оиласига моддий ёрдам кўрсатиш юзасидан тегишли қарор қабул қилинишини эълон қилди. «Санкт-Петербург ҳукумати, қаерда истиқомат қилганларидан қатъий назар, барча ҳалок бўлганларнинг оиласига моддий ёрдам кўрсатиш масаласини кўриб чиқмоқда, — дея таъкидлаган губернатор. — Қурбон бўлганлар орасида нафақат шаҳар, балки Ленинград вилояти фуқаролари ҳам бор. Шунингдек, 34 киши Россиянинг бошқа минтақаларидан, тўрт киши Украина, бир киши эса Беларусь фуқароси. Уларнинг яқинлари билан алоқа ўрнатилган».
Эслатиб ўтамиз, Мисрда қулаган Airbus A321 қурбонлари хотирасига 1 ноябрь, якшанба Россияда умуммиллий мотам куни, деб эълон қилинганди.
Изоҳ (0)