“Ash-Shabob” jangarilari Somalidagi mehmonxonaga uyushtirilgan hujum uchun javobgarlikni o‘z bo‘yniga oldi

“Ash-Shabob” terrorchilik guruhi Somali poytaxti Mogadishodagi Sahafi mehmonxonasiga uyushtirilgan hujum uchun javobgarlikni o‘z bo‘yniga oldi. Bu haqda “Kommersant” xabar bermoqda.

1-noyabrga o‘tar kechasi yuz bergan mazkur hodisa oqibatida 12 kishi halok bo‘lgani haqida avvalroq xabar berilgan edi. “Jangchilarimiz dushmanlar yashayotgan Sahafi mehmonxonasiga bostirib kirdi va uni egallab oldi”, — deya terrorchilar vakilidan iqtibos keltirmoqda Reuters agentligi.

Eslatib o‘tamiz, avvalroq Mogadishoda ikki portlash ro‘y bergandi. Hodisadan so‘ng mehmonxona ichiga kirib olgan jangarilar huquq-tartibot xodimlari bilan otishma keltirib chiqardi. “Pulemyotlar bilan qurollangan shaxslar mehmonxona tomidan bizga qarata o‘t ochmoqda”, — degandi politsiya vakili.