Joriy yil I yarmida mamlakatdagi naqd pul aylanmasi hajmi 2024-yil mos davriga nisbatan 23 foizga oshdi. Bu haqda 23-iyul kuni Markaziy bank xabar berdi.
2025-yil yanvar–iyun oylarida banklar orqali naqd pul aylanmasi hajmi 563 trln so‘mni tashkil etgan. Bunda naqd pul tushumlari 277 trln so‘m, berilgan naqd pullar 286 trln so‘mga yetgan.
Naqd pullar tushumining tarkibiy tuzilishi turlicha bo‘lgan. Xususan, mablag‘larning 37 foizi bank xizmatlaridan, 33 foizi tovarlarni sotishdan kelib tushgan. Shu bilan birga, 13 foiz naqdliklar pulli xizmatlardan tushum qilingan.
Birinchi yarim yillikda bank kartalariga jami 676 trln so‘m kirim qilingan. Bu miqdor 2024-yil mos davridagidan 1,4 barobarga ko‘p.
Olti oy ichida bank kartalaridagi 129 trln so‘m pullar naqdlashtirib olingan. Umumiy hisobda bank kartalariga kelib tushgan pullarning 19 foizi naqdlashtirilgan. Mazkur raqam 2024-yil mos davrida 23 foizni tashkil etgan.
“Mavsumiy omillar taʼsirida naqd pulga bo‘lgan talabning ortishi natijasida banklarga tushgan naqd pullarning ularga bo‘lgan talab o‘rtasidagi farq Markaziy bank tomonidan muomalaga qo‘shimcha naqd pullarni chiqarish orqali taʼminlab borildi”, deya maʼlum qilgan manba.
Yarim yil davomida Markaziy bank muomalaga qo‘shimcha 5,2 trln so‘m naqd pul chiqargan.
2025-yil 1-iyul holatiga ko‘ra, umumiy pul massasidagi naqd pullarning ulushi 18,9 foizni tashkil etgan. Bu bir yil avvalgidan 2,2 foizga kam.
Avvalroq joriy yil 1-iyulida O‘zbekistondagi pul massasi 312,5 trln so‘mga yetgan xabar qilingandi. Mazkur miqdor respublika iqtisodiy tarixida birinchi marta qayd etilgan eng yuqori ko‘rsatkichdir. Shundan 59,1 trln so‘mi muomalada bo‘lgan naqd pullar hisoblanadi.
Izoh (0)