Ukraina bosh vaziri Arseniy Yatsenyuk Misrda Rossiya samolyotining aviahalokatga uchrashi oqibatida qurbon bo‘lganlarning oilalariga hamdardlik bildirdi. Bu haqda “Korrespondent.net” xabar bermoqda.
“Inson hayoti bebaho. Misrda A321 yo‘lovchi samolyotining aviahalokatga uchrashi oqibatida halok bo‘lgan 224 kishining yaqinlariga chuqur hamdardlik bildiraman. Afsuslar bo‘lsinkim, yo‘lovchilar orasida ukrainaliklar ham bor edi. Ularning qarindoshlariga yordam ko‘rsatishni ta’minlash maqsadida Tashqi ishlar vazirligiga murojaat qildim”, — deb yozdi Yatsenyuk Facebook ijtimoiy tarmog‘idagi sahifasida.
So‘nggi ma’lumotlarga ko‘ra, samolyot bortida to‘rt nafar ukrain bo‘lgan. Kuni kecha Sankt-Peterburg gubernatori Georgiy Poltavchenko Ukrainadan ikki, Belarusdan bir nafar yo‘lovchi bo‘lganini ma’lum qilgandi.
Eslatib o‘tamiz, 31-oktabr, shanba kuni Misrda Metrojet (“Kogalimavia”) aviakompaniyasining Sharm-ash-Shayxdan Sankt-Peterburgga uchayotgan Airbus A321 layneri halokatga uchradi. Samolyot bortida bo‘lgan 224 kishining barchasi halok bo‘ldi. Aviahalokatga texnik nosozliklar sabab bo‘lgan bo‘lishi mumkin. Avvalroq kiyevliklar Misrdagi aviahalokatda halok bo‘lganlarni yodga olib, Rossiya elchixonasiga gullar keltirayotgani haqida xabar berilgan edi.
Izoh (0)