Украина бош вазири Арсений Яценюк Мисрда Россия самолётининг авиаҳалокатга учраши оқибатида қурбон бўлганларнинг оилаларига ҳамдардлик билдирди. Бу ҳақда «Корреспондент.net» хабар бермоқда.
«Инсон ҳаёти бебаҳо. Мисрда A321 йўловчи самолётининг авиаҳалокатга учраши оқибатида ҳалок бўлган 224 кишининг яқинларига чуқур ҳамдардлик билдираман. Афсуслар бўлсинким, йўловчилар орасида украиналиклар ҳам бор эди. Уларнинг қариндошларига ёрдам кўрсатишни таъминлаш мақсадида Ташқи ишлар вазирлигига мурожаат қилдим», — деб ёзди Яценюк Facebook ижтимоий тармоғидаги саҳифасида.
Сўнгги маълумотларга кўра, самолёт бортида тўрт нафар украин бўлган. Куни кеча Санкт-Петербург губернатори Георгий Полтавченко Украинадан икки, Беларусдан бир нафар йўловчи бўлганини маълум қилганди.
Эслатиб ўтамиз, 31 октябрь, шанба куни Мисрда Metrojet («Когалимавиа») авиакомпаниясининг Шарм-аш-Шайхдан Санкт-Петербургга учаётган Airbus A321 лайнери ҳалокатга учради. Самолёт бортида бўлган 224 кишининг барчаси ҳалок бўлди. Авиаҳалокатга техник носозликлар сабаб бўлган бўлиши мумкин. Аввалроқ киевликлар Мисрдаги авиаҳалокатда ҳалок бўлганларни ёдга олиб, Россия элчихонасига гуллар келтираётгани ҳақида хабар берилган эди.
Изоҳ (0)