Ерга 31 октябрь куни яқинлашиши кутилаётган фавқулодда хавфли астероид орадан уч йил ўтиб яна Ер атрофига қайтади. Бу ҳақда, Россия Фанлар академиясининг Келдиш номидаги Амалий математика институти илмий ходими ва Халқаро илмий оптик тармоқ (ISON) иштирокчиси Леонид Еленинга асосланиб, «ТАСС» хабар бермоқда.
«TV145 астероиди келаси сафар Ерга 2018 йил 11 ноябрь куни яқинлашади, бироқ 31 октябрдаги яқинлашувдан бироз узоқроқ — 40 миллион километр масофадан учиб ўтади», — деди олим. Унинг қайд этишича, бундан кейинги яқинлашувлар ҳозирча аниқланмаган. Ҳозир маълум бўлган бир факт — ушбу астероид «яқин 30 йил давомида Ер билан тўқнашмайди».
TV145 астероиди Тошкент вақти билан 31 октябрь куни 22:14 да, Ердан 486 минг километр масофада учиб ўтади. Уни бинокл ёки унча катта бўлмаган ҳаваскор телескоплари орқали томоша қилиш мумкин бўлади. Қайд этиш жоиз, биноклда томоша қилиш мумкин астериодлар уфқда камида беш йилда бир марта пайдо бўлади.
Астероид ҳажми 260—650 метрга тенг, деб тахмин қилинмоқда. Ҳажми ва Ерга яқин ўтишидан келиб чиққан ҳолда, мазкур астероид Ерга тўқнашиши мумкин бўлганлиги жиҳатидан фавқулодда хавфли фазовий жисмлар қаторига киритилган. Ушбу рўйхатга диаметри 100 метрдан ортиқ бўлган ва Ердан 7,5 миллион километр масофада учиб ўтадиган жисмлар киритилади.
Изоҳ (0)