Хитой 17 миллиард долларга 130 дона Airbus самолётларини сотиб олади

Хитой 17 миллиард доллар эвазига 130 та Airbus самолётларини сотиб олади. Бу ҳақда «Ведомости» хабар бермоқда.

Bloomberg хабарига кўра, 30 та A330 ва 100 дона A320 лайнерларини сотиб олиш бўйича шартнома Германия канцлери Ангела Меркель ва Хитой бош вазири Ли Кецян ўртасида 29 октябрь, пайшанба куни Пекинда бўлиб ўтган учрашув чоғида имзоланди.

Bloomberg мазкур келишувни кейинги 20 йил ичида жаҳондаги энг йирик авиабозорга айланиши кутилаётган Хитой учун Airbus ва Boeing ўртасидаги рақобат нуқтаи назаридан кўриб чиқди. Boeing прогнозига кўра, кейинги 20 йил давомида Хитойга умумий қиймати тахминан 950 миллиард доллар бўлган 6330 та янги лайнерлар керак бўлади.

Агентликнинг қайд этишича, Хитой иқтисодиётининг ўсиши ва йўлкираси арзон авиакомпанияларнинг пайдо бўлиши хитойликларнинг авиаташувчилардан фойдаланиш имкониятларини оширмоқда ва маҳаллий авиакомпаниялар ўз паркларини кенгайтиришга мажбур бўлмоқда.

Сўнгги вақтларда Хитой ҳукумати хорижий самолёт ишлаб чиқарувчи ширкатларнинг мамлакатга бўлган қизиқишини рағбатлантирмоқда. Хусусан, Тяньцзинда Airbus’нинг A320 самолётларини йиғиш бўйича корхонаси бор, яқин вақт ичида A330’ни йиғиш бўйича корхонани қуриш борасида келишувни имзолаш кўзда тутилган.

Июль ойида Airbus Хитойдан 45 дона янги A330 самолётлари учун буюртма олган эди, буюртма қилинган самоётлар сони кейинчалик 75 тагача оширилиши мумкин. Сентябрь ойида эса Boeing хитойлик авиаташувчилардан 300 самолёт учун буюртма олганди, тез орада Хитойда Boeing 737 лайнерларини йиғадиган корхона иш бошлаши кутилмоқда.