Twitter Inc. aksiyalari birjadan keyingi savdolarda 13 foizga (har bir aksiya uchun 27,2 dollargacha) pasayib ketdi. Bu holat 3-chorak hisoboti e’lon qilinganidan so‘ng ro‘y berdi, deya xabar berdi “RBK”.
Hisobotga ko‘ra, Twitter foydalanuvchilari soni 1,3 foizga oshib, 320 million kishiga yetgan. Shu bilan birga, reklama joylashtirilgani uchun boshqa mamlakatlarga qaraganda yuqori haq olinadigan AQShda foydalanuvchilar deyarli ko‘paymagan.
3-chorakda Twitter tushumi 58 foizga oshgan (569,2 million dollar), ayni paytda kompaniya daromadlarining o‘sish sur’ati ketma-ket beshinchi chorak pasayib bormoqda.
Kompaniyaning 4-chorakdagi tushumi 695-710 million dollarni tashkil etishi kutilmoqda. Bu 739 million dollar tushumni taxmin qilgan Thomson Reuters tahlilchilari bashoratidan kam ko‘rsatkich ekanligi qayd etildi.
Izoh (0)