AQShda foydalanuvchilar o‘z avtomobil, smartfon va o‘yinlarini bemalol buzib, o‘zgartira olishi mumkin bo‘ldi

AQSh Kongressi kutubxonasi raqamli davrda mualliflik huquqi to‘g‘risidagi qonunga (DMCA) o‘zgartirish kiritdi, deya xabar bermoqda TJournal. Endi amerikaliklar o‘zlari sotib olgan avtomobillardagi bort kompyuterlari, videoo‘yinlar, smartfonlar va har qanday boshqa elektron qurilmalarni buzib ochishi mumkin bo‘ldi.

Avvalroq avtomobilning dasturiy ta’minotga aloqador bo‘lmagan qismlarigagina o‘zgartirish kiritish mumkin edi.

DMCA 1998-yilda dasturlar uchun mualliflik huquqlarini himoya qilish maqsadida yaratilgan edi.

2015-yilda Elektron chegaralar jamg‘armasi tashkiloti avtomobillardagi kompyuter dasturlariga qo‘yilgan taqiqni “diagnostika, ta’mirlash va modifikatsiya maqsadida” olib tashlash taklifini kiritdi. Shu bilan birga, o‘nlab avtomobil tashkilotlari bunday tadbirlarga qarshi chiqdi. Ular bort kompyuterlariga ega mashinalar bepul kafolatli ta’mirdan chiqarilishi mumkinligi, ularning egalari o‘zboshimchalik bilan dasturiy ta’minotni “kovlasa”, xavfsizlikka ham, atrof-muhitga ham zarar yetishini ta’kidladi.