Braziliyada firibgarlikning yangi turi paydo bo‘ldi — jinoyatchilar avtomobil egalariga yo‘l harakati qoidalarini buzganlik uchun soxta jarimalarni elektron pochta orqali jo‘natib, to‘lovlarni o‘zlashtirmoqda. O Globo telekanalining ma’lum qilishicha, Matu-Grossu shtati poytaxti Kuyaba shahrida bir necha shunday holatlar qayd etilgan, deya xabar qiladi “TASS”.
Huquq-tartibot idoralari politsiya tergovchilaridan biri soxta jarima olgandan keyingina mazkur jinoiy usul to‘g‘risida xabardor bo‘ldi. Tergovchining o‘zi jo‘natilgan hujjatga ko‘ra yo‘l harakati qoidasini o‘zi hech qachon yurmagan ko‘chada “buzganini” bilgach, aldovni payqab qolgan.
Jinoyatchilar jo‘natgan jarimalar miqdori odatda 80 dan 127 realgachani (20 dan 33 dollargacha) tashkil etgan va ko‘pincha tezlikni oshirish yoki xavfsizlik kamarini taqmaganlik kabi huquqbuzarliklarga oid bo‘lgan. Kishilar haydovchilik guvohnomasidagi ballarni yo‘qotmaslik uchun bunday jarimalarni tezroq to‘lashga harakat qilgan va nayrang qurboniga aylanganini payqamagan.
Firibgarlar soxta hujjatlarni tayyorlash uchun haydovchilarning shaxsiy ma’lumotlari va go‘yoki videokuzatuv kameralariga tushgan transport vositalari fotosuratlaridan foydalangan. Jinoyatchilar qo‘liga bu ma’lumotlar qanday tushganini tergovchilar aniqlashiga to‘g‘ri keladi.
Izoh (0)