Moskvaning “Lokomotiv” klubida to‘p suradigan himoyachisi Vitaliy Denisov Yevropa Ligasi doirasida “Beshiktosh”ga qarshi kechgan uchrashuv haqidagi fikrlarini bildirib o‘tdi, deb yozadi “Uff.uz”.
“Bir futbolchi maydondan chetlatilmagunga qadar teng kurash ketayotgan edi. Tanaffusga qadar hech kim tavakkal qilishni istamadi, ikkinchi bo‘limda esa jonliroq o‘ynay boshladik va vaziyatlar paydo bo‘ldi.
Ammo raqibning goli qandaydir g‘alati chiqdi... Men o‘sha vaziyatda qanday gol bo‘lganini tushuna olmay qoldim ham. Qanday qilib to‘p shuncha futbolchi orasidan o‘tib, uzoq burchakdan joy olganiga tushunish qiyin. Menimcha, darvozabon zarba berilgan vaziyatni ko‘rmay qoldi shekilli.
Uchrashuv oxirida tezkorlik bilan yugurib, zarba berish uchun kuchni qayerdan oldim? Axir biz har kuni mashg‘ulotlarda shug‘ullanamiz-ku! O‘yin oxirlarida esa bo‘sh hudud paydo bo‘lgan edi, men ham tezlik bilan uni bosib o‘tib, zarba berdim”, — deydi Denisov.
Eslatib o‘tamiz, O‘zbekiston terma jamoasi himoyachisi Vitaliy Denisov to‘p tepayotgan Moskvaning “Lokomotiv” klubi Yevropa Ligasining 3-turida o‘z maydonida Turkiyaning “Beshiktosh” jamoasi bilan 1:1 hisobida durang o‘ynadi.
Izoh (0)