2015-yilning o‘tgan davrida “Keksalarni e’zozlash yili” Davlat dasturi ijrosi doirasida faxriylar va yoshi ulug‘ insonlarga tibbiy-ijtimoiy xizmatlar ko‘rsatish darajasi va sifatini oshirish, ularni tizimli asosda sog‘lomlashtirishni tashkil etish, profilaktika tadbirlarini ko‘paytirish, keksalarga xizmat ko‘rsatishga ixtisoslashtirilgan sanatoriy-sog‘lomlashtirish muassasalarining moddiy-texnik bazasini yanada mustahkamlash borasida muayyan ishlar amalga oshirildi, deb xabar beradi O‘zA.
“Mahalla” xayriya jamoat fondi Olmazor tumani bo‘limidan ma’lum qilishlaricha, tumanda Sog‘liqni saqlash vazirligi va boshqa bir qator tashkilotlar bilan hamkorlikda keksalarda surunkali, yashirin kechuvchi kasalliklarni erta aniqlash yo‘li bilan kasalliklar profilaktikasini kuchaytirish maqsadida 2200 faxriy chuqurlashtirilgan tibbiy ko‘rikdan o‘tkazildi. Ko‘rik davomida ularga yuqori texnologiyali ixtisoslashtirilgan tibbiy yordam ko‘rsatildi.
Tibbiyot muassasalari amaliyotiga diagnostika va davolashning ellikdan ortiq yangi usuli joriy etilgani tufayli ko‘plab murakkab jarrohlik operatsiyalari muvaffaqiyatli o‘tkazildi. Chunonchi, yirik bo‘g‘imlar kasalligi bilan og‘rigan 80, umurtqa pog‘onasi kasalligiga chalingan 70 bemorga rekonstruktiv-tiklash hamda konservativ-terapevtik davolash yo‘li bilan tibbiy muolaja ko‘rsatildi. Ko‘z kasalliklariga chalingan 35 bemorga jarrohlik yo‘li bilan tibbiy yordam ko‘rsatishga yo‘llanma berildi.
Tumandagi 58 mahalla fuqarolar yig‘inida otalar choyxonasi, shaxmat-shashka klubi tashkil etildi. “Hech kim mehr va e’tibordan chetda qolmasin!” shiori ostida 80 dan ortiq mehnat faxriysining O‘zbekistondagi diqqatga sazovor joylar, tarixiy shaharlarga sayohati tashkil etilib, ular mustaqillik yillarida amalga oshirilgan ulkan bunyodkorlik ishlari bilan tanishtirildi.
– Nuroniylarimiz Prezidentimiz va xalqimizning doimiy e’tibori hamda g‘amxo‘rligini his etib yashamoqda, – deydi “Nuroniy” jamg‘armasi Olmazor tumani bo‘limi raisi Ahmad Xo‘jayev. – Tumanimizda istiqomat qilayotgan 34 mingdan ziyod keksaning 35 nafari Ikkinchi jahon urushi qatnashchisi, 320 nafari mehnat fronti faxriysidir. Ular chuqurlashtirilgan tibbiy ko‘rikdan o‘tkazildi, 286 nafari sanatoriylarda sog‘lomlashtirildi.
Izoh (0)