Fransiya Milliy assambleyasi deputati, Milliy assambleyadagi “Fransiya – O‘zbekiston” parlamentlararo do‘stlik guruhi raisi Filipp Myone rahbarligidagi delegatsiya O‘zbekistonga tashrif buyurdi. Bu haqda O‘zA xabar bermoqda.
Fransiya delegatsiyasi O‘zbekiston Oliy Majlisi Qonunchilik palatasi va Senatida uchrashuvlar o‘tkazdi. Shuningdek, O‘zbekiston Tashqi ishlar vazirligi matbuot xizmati xabariga ko‘ra, 20-oktabr kuni vazirlik rahbari Abdulaziz Kamilov Myone boshliq delegatsiyani qabul qildi.
Oliy Majlis Qonunchilik palatasi spikeri Nurdinjon Ismoilov O‘zbekiston va Fransiya hamkorligi siyosiy, savdo-iqtisodiy va madaniy-gumanitar sohalarda izchil rivojlanib borayotganini alohida ta’kidladi. Qayd etish joiz, Fransiya parlamenti vakillari, “Fransiya – O‘zbekiston” parlamentlararo do‘stlik guruhi a’zolari yurtimizda o‘tkaziladigan xalqaro anjumanlarda muntazam ishtirok etmoqda.
“Fransiya O‘zbekiston bilan o‘zaro aloqalarni mustahkamlash va yanada kengaytirishga katta e’tibor qaratmoqda. O‘zbekiston va Fransiya ijtimoiy-siyosiy, savdo-iqtisodiy va gumanitar sohalardagi hamkorlikni rivojlantirish borasida ulkan salohiyatga ega. Aloqalarimizni yanada ravnaq toptirish, o‘zaro manfaatli yangi qo‘shma dasturlarni amalga oshirish niyatidamiz”, – dedi Filipp Myone.
Oliy Majlis Senatida bo‘lgan uchrashuvda O‘zbekiston va Fransiya parlamentlari o‘rtasidagi hamkorlikni yanada rivojlantirish, qonun ijodkorligi bo‘yicha tajriba almashishga doir masalalar muhokama etildi. Tashqi ishlar vazirligida bo‘lib o‘tgan suhbat chog‘ida O‘zbekiston—Fransiya muloqotining hamda siyosiy, savdo-iqtisodiy, investitsiya, madaniy-gumanitar va boshqa sohalarda ikki tomonlama hamkorlikni qonuniy qo‘llab-quvvatlashning hozirgi holati va uni yanada rivojlantirishning istiqbollari muhokama qilindi.
Tashqi ishlar vazirligi matbuot xizmatining qayd etishicha, Fransiya parlamentining nufuzli vakillaridan iborat delegatsiya Toshkent shahrida Savdo-sanoat palatasida ham uchrashuv o‘tkazadi.
Izoh (0)