Har kim o‘zi xohlagan diniga e’tiqod qilish erkinligi O‘zbekiston Konstitutsiyasi bilan mustahkamlanib qo‘yilgan. Ammo, fuqarolarga diniy ta’sir o‘tkazish, ularni bir dindan chiqib, boshqasiga kirishga undash, shu maqsadda turli diniy mazmundagi adabiyotlarni tarqatish va boshqa xatti-harakatlarni amalga oshirish amaldagi qonunlarga ko‘ra taqiqlangan. Yaqinda Toshkent shahar bojxona boshqarmasi xodimlari turli xil diniy mazmundagi materiallarning noqonuniy olib o‘tilishiga chek qo‘ydi. Bu haqda boshqarmaning Axborot xizmati “Daryo”ga ma’lum qildi.
Jumladan, boshqarmaning “Boshpochtamt” bojxona posti xodimlari fuqaro N.Mardonov (maqoladagi barcha ism-shariflar o‘zgartirilgan) nomiga xorijdan yuborilgan pochta jo‘natmasini amaldagi tartiblarga muvofiq bojxona nazoratidan o‘tkazganida, buyumlar orasida 27 dona diniy mazmundagi kitoblar borligini aniqlandi.
Shunga o‘xshash holat fuqaro N.Uzoqova nomiga xorijdan kelgan pochta jo‘natmasida ham qayd etildi. Jo‘natma amaldagi tartiblarga muvofiq bojxona nazoratidan o‘tkazilganda, buyumlar orasida “Otkroveniya Boga lyudyam” nomli diniy missionerlik mazmunidagi 6 dona adabiyotlar borligi ma’lum bo‘ldi.
Toshkent shahar bojxona boshqarmasining “Keles” temiryo‘l bojxona posti xodimlari tomonidan Moskva—Toshkent yo‘nalishi bo‘yicha kirib kelgan yo‘lovchi poyezd yo‘lovchisi fuqaro B.Turg‘unovning qo‘l yuklari bojxona nazoratidan o‘tkazilganida, undagi uyali aloqa vositasi xotirasida hamda qo‘shimcha xotirada turli diniy ekstremistik va terrorchilikni targ‘ib qiluvchi ma’ruzalar, suratlar va videoroliklar borligi aniqlandi.
Shuningdek, ushbu bojxona posti xodimlari tomonidan Chelyabinsk—Toshkent yo‘nalishi bo‘yicha kirib kelgan yo‘lovchi poyezdi yo‘lovchilari fuqarolar A.Maxmudov hamda B.Maxsumovlarning qo‘l yuklari bojxona nazoratidan o‘tkazilganida, ularga tegishli uyali aloqa vositalarining xotirasida jami 476 dona diniy mazmundagi turli audio va 21 dona video materiallar borligi aniqlandi.
Bundan tashqari, mazkur bojxona posti xodimlari tomonidan Orenburg—Toshkent yo‘nalishida kirib kelgan yo‘lovchi poyezdi yo‘lovchilarining qo‘l yuklarini bojxona nazoratidan o‘tkazish chog‘ida fuqaro R.Doniyorovning uyali aloqa vositasi xotirasida turli xil diniy mazmundagi audioyozuvlar borligi ma’lum bo‘ldi.
O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita mutaxassislarining tegishli xulosalariga ko‘ra mazkur diniy materiallarni O‘zbekiston Respublikasi hududiga olib kirish man etiladi.
Hozirda yuqoridagi holatlar yuzasidan bojxona surishtiruvlari olib borilmoqda.
Izoh (0)