Тошкент шаҳар божхоначилари турли хил диний мазмундаги материалларнинг ноқонуний олиб ўтилишининг олдини олди

Ҳар ким ўзи хоҳлаган динига эътиқод қилиш эркинлиги Ўзбекистон Конституцияси билан мустаҳкамланиб қўйилган. Аммо, фуқароларга диний таъсир ўтказиш, уларни бир диндан чиқиб, бошқасига киришга ундаш, шу мақсадда турли диний мазмундаги адабиётларни тарқатиш ва бошқа хатти-ҳаракатларни амалга ошириш амалдаги қонунларга кўра тақиқланган. Яқинда Тошкент шаҳар божхона бошқармаси ходимлари турли хил диний мазмундаги материалларнинг ноқонуний олиб ўтилишига чек қўйди. Бу ҳақда бошқарманинг Ахборот хизмати «Дарё»га маълум қилди.

Жумладан, бошқарманинг «Бошпочтамт» божхона пости ходимлари фуқаро Н.Мардонов (мақоладаги барча исм-шарифлар ўзгартирилган) номига хориждан юборилган почта жўнатмасини амалдаги тартибларга мувофиқ божхона назоратидан ўтказганида, буюмлар орасида 27 дона диний мазмундаги китоблар борлигини аниқланди.

Шунга ўхшаш ҳолат фуқаро Н.Узоқова номига хориждан келган почта жўнатмасида ҳам қайд этилди. Жўнатма амалдаги тартибларга мувофиқ божхона назоратидан ўтказилганда, буюмлар орасида «Откровения Бога людям» номли диний миссионерлик мазмунидаги 6 дона адабиётлар борлиги маълум бўлди.

Тошкент шаҳар божхона бошқармасининг «Келес» темирйўл божхона пости ходимлари томонидан Москва—Тошкент йўналиши бўйича кириб келган йўловчи поезд йўловчиси фуқаро Б.Турғуновнинг қўл юклари божхона назоратидан ўтказилганида, ундаги уяли алоқа воситаси хотирасида ҳамда қўшимча хотирада турли диний экстремистик ва террорчиликни тарғиб қилувчи маърузалар, суратлар ва видеороликлар борлиги аниқланди.

Шунингдек, ушбу божхона пости ходимлари томонидан Челябинск—Тошкент йўналиши бўйича кириб келган йўловчи поезди йўловчилари фуқаролар А.Махмудов ҳамда Б.Махсумовларнинг қўл юклари божхона назоратидан ўтказилганида, уларга тегишли уяли алоқа воситаларининг хотирасида жами 476 дона диний мазмундаги турли аудио ва 21 дона видео материаллар борлиги аниқланди.

Бундан ташқари, мазкур божхона пости ходимлари томонидан Оренбург—Тошкент йўналишида кириб келган йўловчи поезди йўловчиларининг қўл юкларини божхона назоратидан ўтказиш чоғида фуқаро Р.Дониёровнинг уяли алоқа воситаси хотирасида турли хил диний мазмундаги аудиоёзувлар борлиги маълум бўлди.

Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита мутахассисларининг тегишли хулосаларига кўра мазкур диний материалларни Ўзбекистон Республикаси ҳудудига олиб кириш ман этилади.

Ҳозирда юқоридаги ҳолатлар юзасидан божхона суриштирувлари олиб борилмоқда.