Bloomberg agentligi jahondagi eng nufuzli 50 kishining ro‘yxatini e’lon qildi. “Nur.kz”ning qayd etishicha, reytingdan asosan iqtisodchilar va yirik kompaniyalarning rahbarlari o‘rin olgan.
Birinchi o‘rin AQSh Federal zaxira tizimiga bir yarim yildan beri rahbarlik qilib kelayotgan Janet Yellenga nasib etdi. Ikkinchi o‘rinni Xitoy rahbari Si Szinpin egalladi. Daromadlari nufuzi kabi oshib borayotgan Apple kompaniyasining rahbari Tim Kuk esa ro‘yxatda uchinchi bo‘ldi.
Ro‘yxatdagi keyingi o‘rinlardan BlackRock kompaniyasi asoschilaridan biri Larri Fink, jahonning eng badavlat kishilaridan biri Uorren Baffet, AQSh prezidenti Barak Obama, Icahn Enterprises rahbari Karl Aykan, Goldman Sachs boshlig‘i Lloyd Blankfeyn Germaniya kansleri Angela Merkel va LinkedIn asoschilaridan biri Reyd Xoffman joy olgan.
Shuningdek, ro‘yxatdan Hindiston bosh vaziri Narendra Modi (13-o‘rin), Yevropa markaziy banki rahbari Mario Dragi (14-o‘rin), Tesla asoschisi Ilon Mask (25-o‘rin), Toyota prezidenti Akio Toyota (29-o‘rin), Rim papasi Fransisk (31-o‘rin) ham joy olgan.
Ma’lumot uchun, Bloomberg agentligi jahonning eng nufuzli odamlari ro‘yxatini 2011-yildan beri e’lon qilib keladi.
Izoh (0)