“G‘alaba uchun front” harakatidan Argentina prezidentligiga nomzod Daniel Ssioli saylovdan 20 kun avval oliy ma’lumot to‘g‘risidagi diplomni qo‘lga kiritdi. Bu haqda mahalliy OAV xabarlariga tayanib, “TASS” xabar bermoqda.
Saylovoldi poygasi yetakchisi salkam 40 yil avval tashlab ketishga majbur bo‘lgan o‘qishini o‘tgan yili yakuniga yetkazishga qaror qildi. Argentina biznes universiteti rahbariyati bir paytlar o‘tagan sinovlarini inobatga olib, Ssioliga to‘qqizta fan bo‘yicha imtihon topshirishiga ruxsat berdi. 5-oktabr, dushanba kuni hukmron partiyadan nomzod marketing yo‘nalishi bo‘yicha diplomni yoqladi. Imtihon komissiyasi unga o‘n balli daraja bo‘yicha yetti baho qo‘ydi.
Argentinada prezidentlik saylovlari 25-oktabrda bo‘lib o‘tadi. 9-avgust kuni o‘tkazilgan dastlabki saylovlarda Ssioli 38,41%, uning yaqin raqobatchisi, muxolifatdagi “Respublika taklifi” partiyasi nomzodi Maurisio Makri esa 24,28% ovoz to‘plagan.
Izoh (0)