Suriyadagi operatsiyaga jalb qilingan rus harbiylari soni, aviazarbalar berish va Suriya armiyasi uchun harbiy texnikalarni yetkazishni ham qo‘shib hisoblaganda, 1,5 ming kishini tashkil etadi. Bu haqda Meduza xabar bermoqda.
“Vedomosti” gazetasining Rossiya Mudofaa vazirligiga yaqin manbaga asoslanib yozishicha, operatsiyada faqat zobitlar va shartnoma asosida xizmat qilayotgan harbiy xizmatchilar qatnashmoqda. Muddatli harbiy xizmat askarlari Suriyaga yuborilmaydi.
Askar onalari qo‘mitalari ittifoqi rahbari Valentina Melnikovaning ma’lum qilishicha, muddatli harbiy xizmatchilar va hatto shartnoma asosida xizmat qilayotgan praporshchiklar ham Suriyaga bormaydi. Uning qayd etishicha, shartnoma asosida xizmat qilayotganlar Suriyaga borishdan bosh tortishi mumkin, biroq Melnikovaning fikricha, “xizmat safari puli kattaligi sabab, Suriyaga borish o‘rinlari uchun harbiylar o‘zaro mushtlashsa kerak”.
Suriyadagi operatsiyada qatnashayotgan zobitlar kuniga 62 dollardan, askarlar esa 43 dollardan rag‘bat puli oladi. Rag‘batlantirishning bu miqdori, Melnikovaning qayd etishicha, hukumat tomonidan 2005-yil oxirida qabul qilingan qarorda belgilab qo‘yilgan. Rossiya qurolli kuchlari harbiy xizmatchilari hayoti va salomatligini sug‘urta qilish bilan shug‘ullanuvchi “Sogaz” sug‘urta guruhi eslatmasiga ko‘ra, agar rossiyalik harbiy xizmatchi halok bo‘lsa, 2,3 million rubl miqdorida, agar nogironlik olsa, unga 584 mingdan 1,75 million rublgacha kompensatsiya puli to‘lanadi.
Ma’lumot uchun, Rossiya Federatsiya kengashi (Senati) 30-sentabr kuni Suriyadagi operatsiyalarda Rossiya qurolli kuchlaridan foydalanishga ruxsat berdi. Rossiyadan harbiy yordam so‘rab Suriya prezidenti Bashar Asad murojaat qilgan.
Izoh (0)