Суриядаги операцияга жалб қилинган рус ҳарбийлари сони, авиазарбалар бериш ва Сурия армияси учун ҳарбий техникаларни етказишни ҳам қўшиб ҳисоблаганда, 1,5 минг кишини ташкил этади. Бу ҳақда Meduza хабар бермоқда.
«Ведомости» газетасининг Россия Мудофаа вазирлигига яқин манбага асосланиб ёзишича, операцияда фақат зобитлар ва шартнома асосида хизмат қилаётган ҳарбий хизматчилар қатнашмоқда. Муддатли ҳарбий хизмат аскарлари Сурияга юборилмайди.
Аскар оналари қўмиталари иттифоқи раҳбари Валентина Мелникованинг маълум қилишича, муддатли ҳарбий хизматчилар ва ҳатто шартнома асосида хизмат қилаётган прапоршчиклар ҳам Сурияга бормайди. Унинг қайд этишича, шартнома асосида хизмат қилаётганлар Сурияга боришдан бош тортиши мумкин, бироқ Мелникованинг фикрича, «хизмат сафари пули катталиги сабаб, Сурияга бориш ўринлари учун ҳарбийлар ўзаро муштлашса керак».
Суриядаги операцияда қатнашаётган зобитлар кунига 62 доллардан, аскарлар эса 43 доллардан рағбат пули олади. Рағбатлантиришнинг бу миқдори, Мелникованинг қайд этишича, ҳукумат томонидан 2005 йил охирида қабул қилинган қарорда белгилаб қўйилган. Россия қуролли кучлари ҳарбий хизматчилари ҳаёти ва саломатлигини суғурта қилиш билан шуғулланувчи «Согаз» суғурта гуруҳи эслатмасига кўра, агар россиялик ҳарбий хизматчи ҳалок бўлса, 2,3 миллион рубль миқдорида, агар ногиронлик олса, унга 584 мингдан 1,75 миллион рублгача компенсация пули тўланади.
Маълумот учун, Россия Федерация кенгаши (Сенати) 30 сентябрь куни Суриядаги операцияларда Россия қуролли кучларидан фойдаланишга рухсат берди. Россиядан ҳарбий ёрдам сўраб Сурия президенти Башар Асад мурожаат қилган.
Изоҳ (0)