Tojikiston Qurolli kuchlarining quruqlikdagi qo‘shinlari qo‘mondoni o‘rinbosari Nazarmahmad Safarov mudofaa vazirining sobiq o‘rinbosari Abduhalim Nazarzoda boshliq qurolli guruhga aloqadorlikda gumon qilinib, hibsga olindi. Bu haqda, Tojikiston IIVdagi vaziyatdan boxabar manbaga asoslanib, “RIA Novosti” xabar bermoqda.
“Polkovnik Safarov 28-sentabrga o‘tar kechasi maxsus xizmatlar va IIVning tezkor-qidiruv tadbirlari davomida hibsga olindi, u Nazarzodaning hamtovoqlaridan biri bo‘lgan”, — dedi agentlik suhbatdoshi.
Manba ma’lumotlariga ko‘ra, hozirgi vaqtda mudofaa vazirining sobiq o‘rinbosari tashkil etilgan guruhga aloqadorlikda gumon qilinayotgan yana bir shaxs — quruqlikdagi qo‘shinlar razvedka xizmati boshlig‘i Umar Yunusovni qidirish ishlari olib borilmoqda.
Eslatib o‘tamiz, 4-sentabr kuni Dushanbe va Vahdatdagi militsiya postlariga qurolli hujum uyushtirilishi natijasida to‘qqiz nafar militsiya xodimi halok bo‘ldi. Tojikiston hukumati mazkur hujumlar ortida Nazarzoda boshliq to‘da turganini e’lon qildi.
4—16-sentabr kunlari davomida Ramit darasida Nazarzoda boshliq qurolli guruhga qarshi aksilterror operatsiyasi olib borildi. Oqibatda qurolli tuzilmaning 27 a’zosi yo‘q qilindi, 139 nafari hibsga olindi.
Izoh (0)