NATO bosh kotibi: Rossiyani siyosiy qamal qilishga urinishdan ma’no yo‘q

Rossiyani siyosiy qamal qilishga urinishdan hech qanday ma’no yo‘q, dedi NATO bosh kotibi Yens Stoltenberg Dagbladet gazetasiga bergan intervyusida. Bu haqda “Korrespondent.net” xabar bermoqda.

Stoltenberg G‘arb va Rossiyaning BMT doirasidagi munosabatlari haqida fikr bildirarkan, sovuq urushdan so‘ng NATO va Rossiya o‘rtasida o‘rnatilgan strategik hamkorlik endilikda yo‘q ekanligini yodga solib o‘tdi.

“Qrimning anneksiyasi va Ukraina sharqida ruslarning paydo bo‘lishi bilan strategik hamkorlik yo‘qqa chiqdi. Lekin biz Rossiya bilan sovuq urush holatida emasmiz”, — dedi NATO bosh kotibi.

“Rossiya BMT Xavfsizlik kengashining doimiy a’zosidir. BMT Xavfsizlik kengashining doimiy a’zosi sifatida Rossiya tashkilotda muhim o‘ringa ega, shu sababli uni siyosiy qamal qilishga urinish hech qanday ma’noga ega emas”, — deya qo‘shimcha qildi Stoltenberg.

Eslatib o‘tamiz, sentabr oyi o‘rtalarida Oq uy matbuot kotibi Josh Ernest, agar Rossiya Suriya prezidenti Bashar Asadni qo‘llab-quvvatlashda davom etadigan bo‘lsa, xalqaro siyosiy qamalda qolishi mumkinligidan ogohlantirgan edi.