Тожикистон Қуролли кучларининг қуруқликдаги қўшинлари қўмондони ўринбосари Назармаҳмад Сафаров мудофаа вазирининг собиқ ўринбосари Абдуҳалим Назарзода бошлиқ қуролли гуруҳга алоқадорликда гумон қилиниб, ҳибсга олинди. Бу ҳақда, Тожикистон ИИВдаги вазиятдан бохабар манбага асосланиб, «РИА Новости» хабар бермоқда.
«Полковник Сафаров 28 сентябрга ўтар кечаси махсус хизматлар ва ИИВнинг тезкор-қидирув тадбирлари давомида ҳибсга олинди, у Назарзоданинг ҳамтовоқларидан бири бўлган», — деди агентлик суҳбатдоши.
Манба маълумотларига кўра, ҳозирги вақтда мудофаа вазирининг собиқ ўринбосари ташкил этилган гуруҳга алоқадорликда гумон қилинаётган яна бир шахс — қуруқликдаги қўшинлар разведка хизмати бошлиғи Умар Юнусовни қидириш ишлари олиб борилмоқда.
Эслатиб ўтамиз, 4 сентябрь куни Душанбе ва Ваҳдатдаги милиция постларига қуролли ҳужум уюштирилиши натижасида тўққиз нафар милиция ходими ҳалок бўлди. Тожикистон ҳукумати мазкур ҳужумлар ортида Назарзода бошлиқ тўда турганини эълон қилди.
4—16 сентябрь кунлари давомида Рамит дарасида Назарзода бошлиқ қуролли гуруҳга қарши аксилтеррор операцияси олиб борилди. Оқибатда қуролли тузилманинг 27 аъзоси йўқ қилинди, 139 нафари ҳибсга олинди.
Изоҳ (0)