Ukraina prezidenti Pyotr Poroshenko BMT Bosh Assambleyasi 70-sessiyasida ishtirok etish maqsadida AQShga amalga oshirgan ishchi tashrifi davomida Nyu-York ko‘chalari bo‘ylab piyoda harakatlanishga majbur bo‘lmoqda. Bu haqda, “Korrespondent.net” xabariga ko‘ra, Poroshenkoning matbuot kotibi Svyatoslav Segolko ma’lum qilgan.
Prezident matbuot kotibining Twitter’dagi sahifasida yozishicha, bunga Nyu-York ko‘chalaridagi katta tirbandliklar sabab bo‘lgan. “Nyu-Yorkdagi tirbandliklar sabab ba’zan o‘z manzilingga piyoda yurib, tezroq yetasan”, — deb yozadi Segolko.
Matbuot kotibi ilova qilgan suratda Poroshenko BMT Bosh Assambleyasidagi Ukraina delegatsiyasi a’zolari, xususan, Ukrainaning AQShdagi elchisi Valeriy Chaliy bilan piyodalar o‘tish joyidan yo‘lni kesib o‘tayotganini ko‘rish mumkin.
Eslatib o‘tamiz, Poroshenko BMT Bosh Assambleyasi 70-sessiyasi doirasidagi tadbirlarda ishtirok etish uchun ayni vaqtda AQShning Nyu-York shahrida bo‘lib turibdi.
Izoh (0)