O‘zbekistonda banklarda hisobvaraqa ochish tartibi soddalashtirildi

O‘zbekiston Respublikasi Markaziy banki boshqaruvining qaroriga ko‘ra, O‘zbekiston Respublikasi banklarida ochiladigan bank hisobvaraqalari to‘g‘risidagi yo‘riqnomaga o‘zgartirish va qo‘shimchalar kiritildi, deya xabar bermoqda “Norma.uz”.

Hujjatga ko‘ra, hisobvaraqa ochishda banklarning yo‘riqnomada ko‘rsatilgan hujjatlardan tashqari qo‘shimcha hujjatlar talab etishi man qilinadi. Avval qonunda belgilangan holatlarda qo‘shimcha hujjatlar so‘rash imkoniyati ko‘zda tutilgan edi.

Endi milliy valyutada korrespondentlik hisobini ochishda tijorat banklarining statistika organlari tomonidan taqdim etilgan Korxona va tashkilotlar yagona davlat registriga kiritilganligi to‘g‘risidagi guvohnoma nusxasini ko‘rsatishi talab etilmaydi. Yuridik shaxslar tomonidan milliy valyutada depozit hisobi ochish uchun esa bankka boshqa hujjatlar qatorida davlat soliq organlarida hisobga qo‘yilganligini tasdiqlovchi ma’lumotnoma taqdim etiladi.

Hujjatda boshqa qo‘shimcha va o‘zgartirishlar ham nazarda tutilgan.