2015-yil 15-sentabr kuni O‘zbekiston Milliy kutubxonasida ingliz yozuvchisi, dunyoda Agata Kristi nomi bilan tanilgan Agata Meri Klarissa Mallouen tavalludining 125 yilligiga bag‘ishlangan “Izquvarlik janri ustasi” deb nomlangan kitob ko‘rgazmasi ochildi. Bu haqda Alisher Navoiy nomidagi O‘zbekiston Milliy kutubxonasi matbuot xizmati xabar bermoqda.
Agata Kristi o‘zi yaratgan 80 detektiv roman, 6 psixologik roman, 19 ta hikoyalar to‘plami va bugungi kunda ham o‘z mashhurligini yo‘qotmagan va dunyo teatrlarida sahnalashtirib kelinayotgan ko‘plab pyesalari tufayli eng taniqli detektiv (izquvar) asarlar yozuvchilari sirasiga kiradi.
Prozanavis va dramaturg Agata Meri Klarissa Mallouen 1890-yil 15-sentabr kuni Torki shahri, Devon grafligida (Buyuk Britaniya) tavallud topgan.
Ingliz detektiv asarlar ustalari an’anasini davom ettirgan holda u 33 ta roman, 1 ta pyesa va 54 ta hikoyalar qahramoni belgiyalik mohir izquvar Erkyul Puaro va 12 ta romanining qahramoni bo‘lgan Sent-Meri-Mid ingliz qishloqchasi fuqarosi, havaskor-izquvar miss Marpl obrazlarini yaratdi.
Agata Kristi tavalludining 125 yilligiga bag‘ishlangan mazkur ko‘rgazmada detektiv janri kitobxonlariga audio kitoblar, mashhur pyesalar to‘plami, shuningdek, jurnallarda chop etilgan asarlari havola etilgan.
Izoh (0)