Xitoyning uchta patrul katerlari 19-sentabr kuni Sharqiy Xitoy dengizidagi bahsli Senkaku (Dyaoyuydao) orollari hududiga kirdi — mazkur orollarni Yaponiya o‘z hududi deb hisoblaydi, deya xabar bermoqda “TASS”.
Qayd etishlaricha, Xitoy kemalari “Yaponiya hududiy suvlariga mahalliy vaqt bilan 10:00 da kirib kelgan”. Yaponiya chegarachilari radioaloqa orqali Xitoy kemalaridan “Yaponiya hududiy suvlarini zudlik bilan tark etishni” talab qilmoqda, biroq ularga nisbatan hech qanday faol harakatlarni qo‘llayotgani yo‘q.
Yaponiya sohil qo‘riqlash xizmatidan ma’lum qilishlaricha, Xitoy kemalari 10-sentabrdan beri birinchi marta, yil boshidan beri esa 26-marta mazkur bahsli hududlarga kirib kelmoqda.
Ma’lumot uchun, Yaponiya va Xitoy o‘rtasidagi Senkaku orollari bo‘yicha bahslar 2012-yil sentabrida, Tokio ushbu orollarni ularning egalaridan sotib olganini e’lon qilganidan so‘ng boshlangan. Shundan beri Xitoy kemalari mazkur bahsli orollar yaqinida suzib yurib, tez-tez namoyishkorona ularga yaqinlashadi.
Izoh (0)