Syurix va Jeneva (Shveysariya) Nyu-York hamda Londonni ortda qoldirib, yashash uchun dunyodagi eng qimmat shaharlar, deb tan olindi. Bu haqda UBS AG banki tadqiqotlariga tayanib, “Interfaks” xabar bermoqda.
Uch kishidan iborat oila 122 ta pozitsiyadan iborat (uy ijarasi to‘lovi bunga kiritilmagan) mahsulot va xizmatlarning minimal to‘plamini qo‘lga kiritish uchun Syurixda oyiga 3600, Jenevada esa 3500 dollar ishlab topishi kerak. Nyu-Yorkda bu ko‘rsatkich 3340, Londonda esa 2800 dollarga teng.
Shunisi ham borki, Shveysariyadagi mazkur shaharlar aholisi boshqa mamlakatdagilarga qaraganda yaxshiroq topadi. Masalan, Syurixdagi o‘rtacha ish haqi soatiga 41 dollarni tashkil etadi. Maoshlar indeksida (unda Nyu-York aholisining ish haqi 100 punkt sifatida asos qilib olingan) Syurix 141,7, Jeneva 135,1 punk to‘pladi. Ushbu ro‘yxatdagi oxirgi o‘rinni 6,3 punkt ko‘rsatkich bilan Kiyev va Nayrobi egallagan.
“Big Mag” sendvichini sotib olish uchun qancha vaqt ishlash lozimligini ko‘rsatuvchi “Big Mag indeksi”ni Gonkong va Lyuksemburg tegishlicha, 9 va 10 daqiqa bilan boshlab berdi. Tokio, Sidney, Vena, Myunxen, Monreal va Nikosiya kabi 19 ta shahar aholisiga buning uchun 15 daqiqadan kamroq muddat kerak bo‘ladi. Qohira, Jakarta, Mexiko va Manilada bunga bir soatdan ziyod, Nayrobida esa deyarli uch soat kerak bo‘ladi.
Yana bir shunday ko‘rsatkich — “iPhone indeksi”ga ko‘ra, 16 Gb xotiraga ega iPhone 6 xarid qilish uchun Syurix fuqarosiga 21 soat, Nyu-York, Mayami, Los-Anjeles va Chikago ahli uchun 30 soatdan kamroq, londonlikka esa 41 soat kerak bo‘ladi. Moskvada bu smartfonni bir oyda ishlab olish mumkin bo‘lsa, Kiyevda buning uchun 13 hafta ter to‘kishga to‘g‘ri keladi.
Izoh (0)