Qozog‘istonning Olmaota va Ostona shaharlaridagi valyuta ayirboshlash shoxobchalari, valyuta taqchilligi sababli, dollar va yevro sotishni to‘xtatib qo‘ydi. Bu haqda “Vedomosti” xabar bermoqda.
“MIG” valyuta ayirboshlash shoxobchalari tarmog‘idan ma’lum qilishlaricha, sotiladigan bir dollar narxi 297 tengega chiqib ketgan, biroq ayni vaqtda tarmoq ixtiyorida dollar ham, yevro ham yo‘q. “Odamlar faqat dollar va yevro sotib olyapti, hech kim tengegа almashtirmayapti, shu sababli valyuta ham yo‘q”, — deydi boshqa bir shoxobcha vakili.
Olmaotadagi valyuta ayirboshlash shoxobchalarida dollar 285 tengedan 296 tengegacha narxda sotib olinmoqda. Ostonadagi shoxobchalar esa dollarni 290 tengedan xarid qilmoqda. Qozog‘iston fond birjasining 16-sentabrdagi savdolari chog‘ida dollar kursi 283,98 tengegacha ko‘tarildi. Dollarning rasmiy kursi esa chorshanba kuni 276,83 tengega teng edi.
Eslatib o‘tamiz, Qozog‘iston 20-avgustdan tengening erkin ayirboshlov kursiga asoslangan yangi pul-kredit siyosatini amalga oshirishiga kirishdi. Natijada tenge dollarga nisbatan o‘sha kunning o‘zidayoq 26 foizga qadrsizlanib, bir dollar qiymati 255,26 tengega to‘g‘ri kelib qolgandi.
Izoh (0)