Lionel Messi “Roma”ga qarshi o‘yinda navbatdagi rekordni o‘rnatishi mumkin

“Barselona” hujumchisi Lionel Messi navbatdagi rekord ostonasida turibdi, deya xabar bermoqda “Korrespondent.net”.

Agar 28 yoshli argentinalik futbolchi kataloniyaliklarning “Roma”ga qarshi o‘yinida maydonga tushsa, Yevropa Chempionlar ligasida 100 ta o‘yin o‘tkazgan eng yosh futbolchiga aylanadi.

Chempionlar ligasi doirasidagi avvalgi 99 o‘yinida Messi “Barselona” raqiblari darvozasiga 77 ta gol urgan bo‘lib, mazkur natija ham musobaqa tarixidagi eng yaxshi ko‘rsatkich hisoblanadi.

Bundan tashqari, Messi YеChLda golga assistentlik qilish bo‘yicha uchinchi hisoblanadi — u shu vaqtgacha Chempionlar ligasida 22 ta golga hammualliflik qilgan. Undan faqat “Real” hujumchisi Krishtianu Ronaldu (23 ta) va “Manchester Yunayted”ning sobiq yarim himoyachisi Rayan Giggz (30 ta) yaxshiroq ko‘rsatkichga ega.