Hindistonning markaziy qismidagi Madxya-Pradesh shtati, Dxabua okrugida joylashgan Petlavad shahridagi portlash qurbonlari soni 104 kishiga yetdi, 150 kishi jarohat olgan. Qutqaruv ishlari davom etmoqda, vayronalar ostida yana kamida 20 kishi qolib ketgan. Bu haqda “TASS” xabar bermoqda.
Huquq-tartibot idoralari avval bildirib o‘tilgan mahalliy restorandagi gaz balloni portlashi to‘g‘risidagi taxmindan voz kechdi. Hodisa tog‘li hududlardagi burg‘ilash ishlari uchun portlovchi moddalardan foydalanishga ruxsatnomasi bo‘lgan Rajendra Kasavaning uyida ro‘y bergani aniqlandi: u bu yerda katta miqdordagi portlovchi moddalar saqlab kelgan.
Kuchli portlash oqibatida Kasava yashagan ko‘p qavatli uy va atrofdagi ikki bino butkul vayron bo‘lgan, o‘ndan ortiq uylar jiddiy shikastlangan.
Hindiston bosh vaziri Narendra Modi Twitter orqali mazkur hodisa yuzasidan hamdardligini bildirgan. Rasmiylar halok bo‘lganlarning oilasiga 3 ming dollardan tovon puli to‘lanishini e’lon qildi.
Izoh (0)