Ҳиндистоннинг марказий қисмидаги Мадхья-Прадеш штати, Дхабуа округида жойлашган Петлавад шаҳридаги портлаш қурбонлари сони 104 кишига етди, 150 киши жароҳат олган. Қутқарув ишлари давом этмоқда, вайроналар остида яна камида 20 киши қолиб кетган. Бу ҳақда «ТАСС» хабар бермоқда.
Ҳуқуқ-тартибот идоралари аввал билдириб ўтилган маҳаллий ресторандаги газ баллони портлаши тўғрисидаги тахминдан воз кечди. Ҳодиса тоғли ҳудудлардаги бурғилаш ишлари учун портловчи моддалардан фойдаланишга рухсатномаси бўлган Ражендра Касаванинг уйида рўй бергани аниқланди: у бу ерда катта миқдордаги портловчи моддалар сақлаб келган.
Кучли портлаш оқибатида Касава яшаган кўп қаватли уй ва атрофдаги икки бино буткул вайрон бўлган, ўндан ортиқ уйлар жиддий шикастланган.
Ҳиндистон бош вазири Нарендра Моди Twitter орқали мазкур ҳодиса юзасидан ҳамдардлигини билдирган. Расмийлар ҳалок бўлганларнинг оиласига 3 минг доллардан товон пули тўланишини эълон қилди.
Изоҳ (0)