Xalqaro valyuta jamg‘armasi Qozog‘iston tengening erkin kursi rejimiga o‘tganini ma’qullaydi va tuzilmaviy islohotlar o‘tkazilishi zaruriyatini ta’kidlaydi. Bu haqda XVJning Yaqin Sharq va Markaziy Osiyo mamlakatlari departamenti direktori Masud Ahmad aytib o‘tdi, deb yozadi “RIA Novosti”.
Ahmad 2—4-sentabr kunlari Qozog‘istonga tashrif buyurib, rasmiy organlar vakillari bilan uchrashdi. O‘z tashrifi yakunlariga ko‘ra bergan bayonotida XVJ vakili Qozog‘iston, hududdagi boshqa mamlakatlar kabi, neft narxi tushib ketgani, Rossiya va Xitoyda o‘sish sur’atlari pasaygani kabilar tufayli jiddiy tashqi shoklarni boshidan kechirayotganini aytib o‘tdi.
“Ushbu shoklar sharoitida mamlakatning iqtisodiy o‘sishi keskin sekinlashdi, moliyaviy sharoitlar esa qiyinlashdi. Shunga qaramay, rasmiy organlarning makroiqtisodiy va moliyaviy barqarorlikni ta’minlash uchun zarur choralarni ko‘rish bo‘yicha qat’iyati meni lol qoldirdi”, — dedi u.
Izoh (0)