Pan Gi Mun iqlim o‘zgarishlariga qarshi kurashdagi yordami uchun Xitoyga minnatdorchilik bildirdi

Xitoyda rasmiy tashrif bilan bo‘lib turgan BMT Bosh kotibi Pan Gi Mun mamlakat rahbari Si Szinpin, bosh vazir Li Ketsyan, bosh vazir o‘rinbosari Lyu Yandun va tashqi ishlar vaziri Van I bilan muzokaralar o‘tkazdi. Ularda, jumladan, iqlim o‘zgarishi bilan bog‘liq muammolar ham muhokama etildi. Bu haqda “TASS” xabar bermoqda.

“Bosh kotib iqlim o‘zgarishlariga munosabat bildirishda tegishli siyosat yuritayotgani hamda aniq harakatlar amalga oshirayotgani uchun Xitoy ma’murlariga minnatdorchilik bildirdi. Shuningdek, mamlakatning Koreya yarim oroli, Janubiy Sudan va Eron bilan bog‘liq masalalarni hal etishda muhim rol o‘ynayotganini ta’kidladi”, — deya xabar beradi xalqaro tashkilot matbuot xizmati.

Pan Gi Mun Xitoy rahbarini shu oy oxirida o‘tkaziladigan BMT Bosh assambleyasining 70-sessiyasida ishtirok etishini kutayotganini bildirdi.